‘వీరసింహారెడ్డి’ ట్విట్టర్ రివ్యూ

తెలుగు రాష్ట్రాల్లో ‘వీరసింహారెడ్డి’ (Veera Simha Reddy) జాతర మొదలైపోయింది. ఈరోజు తెల్లవారుజాము నుంచే థియేటర్ల వద్ద బాలకృష్ణ (Balakrishna) అభిమానులు టపాసుల మోత మోగిస్తున్నారు. చాలా సంవత్సరాల తరవాత సంక్రాంతికి తమ అభిమాన హీరో సినిమా రావడంతో సంబరాలు చేసుకుంటున్నారు. ఇక యూఎస్‌లో ఇప్పటికే ప్రీమియర్ షోలు చూసిన ప్రేక్షకులు ట్విట్టర్ ద్వారా తమ అభిప్రాయాలను వెల్లడిస్తు్న్నారు. కొంత మంది సినిమా చాలా బాగుందని అంటే.. మరికొందరు మాస్ జాతర అని, ఫ్యాన్స్‌కు విపరీతంగా నచ్చుతుందని అంటున్నారు. మొత్తం మీద మిశ్రమ స్పందన వస్తోంది.

నటసింహా నందమూరి బాలకృష్ణ (Balakrishna) హీరోగా డైరెక్టర్ గోపీచంద్ మలినేని తెరకెక్కించిన పక్కా మాస్ కమర్షియల్ మూవీ ‘వీరసింహారెడ్డి’ (Veera Simha Reddy) నేడు థియేటర్లలోకి వచ్చింది. రెండు తెలుగు రాష్ట్రాలతో పాటు ఓవర్సీస్‌లో ఈ సినిమా గ్రాండ్‌గా రిలీజ్ అయ్యింది. యూఎస్‌లో ఇప్పటికే ప్రీమియర్ షోలు పడిపోయాయి. ఇక తెలుగు రాష్ట్రాల్లో ఈరోజు తెల్లవారుజాము నుంచి థియేటర్ల వద్ద జాతర మొదలైపోయింది. బాలయ్య అభిమానులు థియేటర్ల వద్ద టపాసుల మోత మోగిస్తున్నారు. తెరమీద బాలయ్య ఎంట్రీని తమ స్మార్ట్‌ఫోన్లలో బంధించి సోషల్ మీడియాలో పెడుతున్నారు.

తెలుగు రాష్ట్రాల్లో ఇంకా తొలి ఆట పూర్తికానప్పటికీ అమెరికాలో ఇప్పటికే ప్రీమియర్ షోలు పూర్తయ్యాయి. దీంతో అక్కడ సినిమా చూసినవారు ట్విట్టర్ ద్వారా తమ అభిప్రాయాలను వెల్లడిస్తున్నారు. ప్రస్తుతానికి అయితే ‘వీరసింహారెడ్డి’ సినిమాకు మిశ్రమ స్పందన వస్తోంది. కథలో కొత్తదనం ఏమీ లేదని చాలా మంది అంటున్నారు. సినిమా ప్రారంభమైన సుమారు 15 నిమిషాల వరకు అనవసరమని.. ఆ తరవాత నుంచే అసలు సినిమా మొదలవుతుందని కొందరు అభిప్రాయం వ్యక్తం చేస్తున్నారు. బాలయ్య యాక్టింగ్, డైలాగులు, యాక్షన్ బ్లాక్స్, తమన్ బ్యాక్‌గ్రౌండ్ స్కోర్, పాటలు సినిమాకు బలాలని చెబుతున్నారు. అయితే, కొన్ని యాక్షన్ సీన్లు మరీ అతిగా ఉన్నాయని.. విపరీతంగా ఉన్న ఫైట్లు కొందరికి విసుగు తెప్పించొచ్చని కూడా అంటున్నారు.

ఇక ఈ సినిమాలో విలన్‌గా నటించిన కన్నడ హీరో దునియా విజయ్ గురించి ఒక్కరు కూడా మాట్లాడటం లేదు. వరలక్ష్మీ శరత్‌కుమార్ చాలా బాగా నటించారని కొందరు ట్వీట్లు చేసినా.. దునియా విజయ్ గురించి మాత్రం అస్సలు సౌండ్ లేదు. ఇది బాలయ్య వన్ మ్యాన్ షో అని మాత్రం చెబుతున్నారు. బాలయ్య, తమన్ పేర్లే మారుమోగుతున్నాయి. మొత్తం మీద ‘వీరసింహారెడ్డి’ సినిమా బాలయ్య అభిమానులకు బాగా నచ్చుతుందని.. సాధారణ ప్రేక్షకులకు పెద్దగా నచ్చకపోవచ్చని అంటున్నారు. అలాగే బీ, సీ సెంటర్లలో ఈ సినిమా బాగా ఆడొచ్చని చెబుతున్నారు. నిజానికి బాలయ్య సినిమా అంటేనే టార్గెట్ బీ, సీ సెంటర్లు. అక్కడ గట్టిగా ఆడితే కలెక్షన్లు దుమ్ములేపడం ఖాయం. ‘అఖండ’ సినిమా విషయంలోనూ ఇదే జరిగింది.